CAGAYAN DE ORO CITY-Gibulgar karon sa pipila sa kapin libo ka miembro sa Cafgu ubos sa 4th ID, Philippine Army ang pagkalangan sa ilang subsistence allowance balor 4-mil 500 pesos kada-bulan.
Miingon si alyas Mr Cafgu nga bisan gamay ra ang dawaton nila nga ayuda isip kaabag sa gobierno apan importante kini alang sa ilang mga pamilya.
Dugang ni Mr Cafgu nga unta dili ikasuko sa kadagkuan sa 4th ID, Philippine Army nga gidangop nila kini sa Bombo Radyo kay naglisod usab sila sa kada-adlaw nila nga panginahanglan alang sa ilang mga pamilya.
Samtang nakurat ang liderato sa 4th ID, Philippine Army sa pahayag sa pipila ka Cafgu members nga giingong nalangan ang pagdawat sa ilang binulan nga subsistance allowance.
Miingon si 4th ID, Philippine Army spokepserson 1Lt Tere Ingente nga gilayon nila kini nga aksyonan aron mahatagan sa kasulbaran.
Dugang ni Ingente nga wala na kini moagi sa dibisyon apan sa matag-unit hinungdan nga gilayon kini nga ilang hatagan sa aksyon.
Nasayran nga ang mga Cafgu ang direktang kaabag sa regular nga mga sundalo ilabina kon may mga ilusad nga operasyon batok sa rebeldeng New People’s Army o NPA.
