CAGAYAN DE ORO CITY-Mismo ang tropa sa Scout Ranger Company ug 4th Special Forces Company ang nakaluwas sa kanhi bihag nga si Rev. Fr. Teresito ‘Chito’ Suganob nga na-hostage sa mga teroristang Maute-ISIS sa Marawi City,Lanao del Sur.
Kini human gilusob sa militar ang lokasyon sa mga terorista na nakatago sa Moske Bato nga nakabase sa maong dakbayan.
Naluwas usab sa mga sundalo ang kauban ni Suganob nga usa ka maestro nga si Lordvin Acoño.
Una nang gibutyag ni AFP spokesperson Maj Gen Restituto Padilla nga naluwas sa ilang tropa si Suganob samtang nakagawas sa Moske Bato tungod sa grabeng sinukliay sa mga bala batok mga terorista.
Dugtong niini,milugwa ang taho nga i-presentar na sa militar si Suganob atubangan sa media sa kauluhan ning adlawa.
Si Suganob ang kabahin sa kapi’g 200 ka bihag kaniadto nga gihuptan sa mga terorista dihang miulbo ang pag-atake sa Marawi City niadtong Mayo 23,2017.
Hisayrang sukad miulbo ang giyera,dul-ag 800 ka kinabuhi na ang nakalas diin daghan niini ang gikan sa mga terorista.(with reports from Bombo Laurence Geralde Jr).
