CAGAYAN DE ORO CITY – Gipanguluhan na sa Misamisnong heneral sa Philippine National Police ang Police Regional Office 10 nga si Brig Gen Rolindo Suguilon nga nakabase sa Kampo Alagar sa Brgy Lapasan ning syudad.
Kini human pormal nang gitugyan ni kanhi PRO 10 Director Brig Gen Jaysen De Guzman ang responsibilidad ug ubang obligasyon kang Suguilon nga gipanguluhan ni PNP chief directoral staff Lt Gen Edgar Alan Okubo sa Alagar kaganihang hapon.
Gipasalamatan ni Suguilon si Pres Bongbong Marcos ug PNP chief Gen Nicolas Torre III nga gihatagan kini sa pagsalig nga panguluhan ang kapolisan sa Northern Mindanao region.
Siya miingon nga ipadayon niya ang mga programa ni De Guzman nga nasugdan ug mopatuman sa dugang kabag-uhan sa PRO 10 alang sa pagminintar sa kahusay’g kalinaw sa rehiyon.
Si Suguilon,lumad nga taga-El Salvador City,Misamis Oriental ang aktibong miembro sa Philippine National Police Academy of Class 1995.
Hisayrang sa wala pa hingpit gibakante ni De Guzman ang iyang puwesto, gipasalamatan niini ang naglangkob sa PRO 10 ingon man ang ubang mga ahensiya sa gobierno ug mga sakop sa prensa aron makaabot ang mga programa sa PNP ngadto sa katawhan.
