Dako ang pagtuo ni Barangay Chairman Jaime Frias sa Barangay 23 sa Dakbayan sa Cagayan de Oro nga gamay ra kaayo ang tsansa nga mahimong balaod ang sugyot ni Ombudsman Jesus Crispin “Boying” Remulla nga i-mando ang civil service eligibility sa mga kandidato sa barangay ug Sangguniang Kabataan tungod kay sigurado nga daghan ang mokontra niini sa Kongreso ug Senado.
Gipahayag sa opisyal nga dili ang taas nga grado o eligibility ang basihan sa pagkahimong maayong lider, kon dili ang tinuod nga tinguha ug aksyon sa pagpangalagad sa mga tawo.
Gipasabot pa ni Frias nga kadaghanan sa mga eligible mas pilion ang motrabaho sa mga opisina sama sa City Hall para makadawat og dako nga sweldo kaysa modawat sa 7,000 ka pesos nga allowance sa barangay.
Dugang pa sa kapitan, ang tinuod nga serbisyo sa komunidad nagkinahanglan og padayon nga pagbansay sa pagdumala ug pagpahiangay sa kausaban sa panahon imbes nga magsalig ra sa maong rekisito.–
