CAGAYAN DE ORO CITY – Pagsulbad sa suliran sa mga basura,paghatag amnestiya sa market vendors,traffic violators ug walay pagpasaka sa buluhisan ang tutukan ni City Mayor elect Rolando ‘Klarex’ Uy sa unang usa gatos ka adlaw niini sa katungdanan diha sa city hall.
Kini ang kabahin sa iyang tubag sa pangutana sa Bombo Radyo sa dihang nakig-atubang si Kongresista Klarex sa media gikan mahuman sa paghurar isip piniling bag-ong mayor sa dakbayan.
Namahayag ang bag-ong mayor nga gusto niya ma-rebyo ang kontrata sa IPM ug city govt kon nganong may pipila ka bahin sa syudad nga langan makuha ang mga basura.
Dili usab igsapayan ni Klarex nga walay mosulod nga kinitaan sa dakbayan kaysa pahamtangan sa dagkong silot sa city hall ang public utility drivers sa dakbayan.
Samtang giputol ni City Mayor Oscar Moreno ang mga intriga nga talikdan niya ang pagsilbi nila nga alyadong-politika ni ‘Klarex’ nga sunod mopadagan sa dakbayan.
Kini tungod sa giingong kagustuhan sa mayor nga mapabilin ang mga epektibo nga department heads aron masiguro nga mapadayon ang ‘momentum of services’ nga iyang natunol sa katawhan sulod sa siyam ka tuig.
Miingon ang mayor nga kanunay ang iyang pagsuporta sa Klarex administration bisan kon magkalahi man ang istilo sa ilang pagdumala sa kalihukan sa dakbbayan.
Dugtong niini,mag-agad na sa deskrisyon ni Uy kon unsay mga angay bag-uhon nga palisya ug istilo sa serbisyo sa mga empleyado sa city hall ngadto sa katawhan sa dakbayan.
Miingon ang media relations ni Klarex nga si Dr Fred Dellava nga anaa sa gahom sa bag-ong administrasyon ang pagpabilin o pagbalhin sa mga empleyado sa city govt kon mosugod na sa trabaho sa petsa 1 sa Hulyo ning tuiga.
Apan gipasalig niini nga e-plastar pag-ayo ni Uy ang mamahimong komposisyon sa molangkob sa administrasyon pag-abot sa trabaho kay pulos pamilyado ang mga empleyado sa city hall.
Samtang gidasig ni city administrator Teodoro ‘Teddy’ Sabugaa Jr ang mga empleyado ug dept heads nga ilang mabiyaan sa city hall nga mokugi pa’g trabaho ubos sa Uy administration.
Kini bisan kon may mga opisyal ug empleyado nga mabalhin ug mapulihan sa ilang katungdanan kay katungod sa sunod nga administrasyon ang pagpahiluna aron epektibo nga makasilbi sa dakbayan.
Miingon si Sabugaan nga dili angayang magpaluya-luya apan motrabaho lamang sila kon unsay isangon kanila sa pagsilbi sa katawhan sa syudad.
Sa pikas bahin,gihupay sa mayoriya sa umaabot 20th city council ang solido nga suporta ngadto sa liderato ni Klarex ning dakbayan.
Gihimo ni Majority Leader Kag Ian Mark Nacaya ang garantiya nunot sa kabalaka nga maglisod si Klarex sa iyang mga programa kay dili niya alyado ang sunod nga mahimong bise-mayor.
Si Nacaya miingon nga motigbabaw gihapon ang puwersa sa mayoriya nga andam sa kanunay nga mosuporta sa executive agenda sa Uy administration.Hisayrang magsilbing bise-mayor ni Klarex si City Councilor Jocelyn ‘Bebot’ Rodriguez nga gikan sa kuwalisyon sa partidong Padayon Pilipino-Centrist Democratic Party ug Bag-ong Cagayan.
Sa laing bahin,gi-welcome ni Roads and Traffic Administration asst administrator Engr Nonito Oclarit nga nakit-an nga isyu ni Uy ang kalisdanan sa PUJ drivers nga kalbaryo ang pagbayad sa nagkadaiyang traffic law violations.
Kini human gusto sa umaabot mayor nga ubsan ang monetary penalties sa PUJ drivers nga nakahimo’g salaod sa lagda sa trapiko.
Miingon si Oclarit nga nakaadam sila pag-atubang sa city hall o konseho kon ipatawag na alang sa pag-amindar sa ordinansa nga gibasehan sa RTA sa pagpatuman sa balaod-kadalanan.
