NANAWAGAN ang grupong Bugo Environmental Advocates nga mahatagan og seryosong pagtagad ang dugay nang problema sa Barangay Bugo, diin muawas dayon ang tubig sa Alae River matag adunay kusog nga pag-ulan o bagyo, hinungdan sa pagsaka sa tubig baha sa ilang lugar.
Sumala ni Mon Mekaniko, representante sa Bugo Environmental Advocates, mubo ra ang riprap sa dike, ug mao kini ang pangunang rason nganong kanunay mabiktima sa baha ang ilang barangay.
Naghinaot ang grupo nga makabuhat na ang Barangay Bugo ug konkretong flood-mitigating measures, aron mapugngan ang balik-balik nga pagbaha, ilabi na nga daghan ang mga lumolopyo nga namuyo sa flood-prone areas.
Matod pa sa grupo, dili angay nga maanad na lamang ang mga residente sa pagbaha, labi na kadtong wala pa sukad makasinati og grabeng baha, tungod kay posibleng mas dako ang risgo sa kinabuhi ug kabtangan sa umaabot.
