Mihatag sa klaro nga tubag ang Cagayan de Oro LGU sa programa sa Bombo Radyo bahin sa reklamo nga gipost sa social media sa pipila ka lalaki nga nagpaila nga miyembro sa Task Force Basura. Gibutyag ni City Information Office Chief Jade Adecer sa programa Zona Libre, nga dili sakop sa opisyal nga Task Force Basura ang mga reklamante. Siya mitin-aw nga ang task force namugna pinaagi sa Executive Order ni Mayor Rolando “Klarex” Uy ug gilangkoban sa lain-laing departamento sa City Hall nga gimanduan sa pagtinabangay aron matubag ang ultimatum sa mayor batok sa pipila ka semana nga walay garbage collection niadtong Agosto. Ang mga nagreklamo giila nga mga palero nga kasagaran nagpuyo sa Zayas, Barangay Carmen, ug nakapailalom sa City Local Environment and Natural Resources Office (CLENRO).
Dugang pa ni Adecer, adunay miscommunication tali sa CLENRO, CWSD, ug City LGU bahin sa gipanghire nga temporaryong palero niadtong Agosto. Nadugay ang ilang suhulan tungod sa taas nga proseso sa pagkuha sa budget human sa bidding. Gipadayag usab nga ang reklamo nag-ugat sa kalibog sa mga palero kung asa nila kuhaon ang ilang suhulan.
