CAGAYAN DE ORO CITY – Misugod na ang imbestigasyon sa City Internal Affairs Service o CIAS batok sa aktibong pulis nga sakop sa Cagayan de Oro City Police Office nga namusil-patay sa civilian asset sa Brgy Camaman-an ning dakbayan.
Miingon si CIAS head Lt Col. Henry Cay-as nga kasong grave misconduct ang gipasaka nila batok sa ilang kaubang pulis nga naakusahan sa paghimo sa maong salaod.
Siya miingon nga gikasubo nila ang gidangatan sa ilang kaubang pulis apan trabaho sa CIAS nga disiplinahon kini subay sa nahuptang ebedensiya sa maong kremin.
Gipasalig ni Cay-as nga patas ang ilang ihatag nga pagtratar sa kaso nga target tapuson sulod lang sa pipila ka adlaw.
Gipadumduman sa CIAS ang tanang pulis nga magmatngon sa kanunay sa ilang mga trabaho ug mga kalihukan atubangan sa publiko.
Kini sa tuyo nga dili mapun-an ang kontrobersya nga giatubang sa Philippine National Police o PNP nga dako’g epekto sa impresyon sa katawhan.
Miingon si Cay-as nga angayang dumdumon sa mga pulis nga lisod ang pagsulod sa propesyon ug mahimong kawang lamang ang ilang mga paningkamot kung matangtang sila sa PNP tungod sa pagpasagad sa mga trabaho niini.
