CAGAYAN DE ORO CITY – Gipasidaan subli sa Police Regional Office 10 sa publiko nga kanunay hataga’g prayoridad ang kaluwasan kaysa lulinghayaw sa matag-panahon sa bakasyon sa Northern Mindanao.
Gihimo ni PRO 10 Director Brig Gen Jaysen De Guzman ang pahimangno kay nasubo sila nga nakatala ang rehiyon sa tulo ka kinabuhi ang nakalas epekto sa magkalahi nga hitabo sa pagkalumos sa Iligan City,Misamis Oriental ug Bukidnon.
Namahayag ang heneral nga nahatag nila ang hugot nga seguridad sa publiko apan wala na sa ilang kontrol ang pipila ka outdoor recreational activities.
Hinoon,kini lang nga dili maayong hitabo ang natala sa mismong kampanya nila sa summer vacation o SUMVAC 2025 sa rehiyon.
Nagkahulugan nga nakab-ot sa laing higayon sa PRO 10 ang sobra ka malinawon nga kahimtang sa seguridad sa panahon nga nagbakasyon ang kadaghanan sa bisan asa nga bahin sa Northern Mindanao.
Siya miingon nga nakab-ot ang maong kahusay’g kalinaw gumikan sa pag-abag usab sa local govt units ug ubang mga ahensiya sa gobierno nga adunay dako’g kahingaw sa seguridad sa rehiyon.
