CAGAYAN DE ORO CITY – Gilusad sa militar ang subsob nga pursuit operation batok sa dili moubos 30 ka sakop sa rebeldeng New People’s Army o NPA nga ilang gika-engkuwentro sa Purok 6,Sitio Talabaga,Brgy San Juan,Gingoog City,Misamis Oriental.
Kini human unang milungtad sa 20 minutos ang engkuwentro sa tali duha ka panig nga nagresulta sa kamatayon ni Private First Class John Mar Dalogdog,29 anyos nga taga-Purok 5,Brgy 19 sa maong syudad.
Miingon si 58th IB,Philippine Army commander Lt Col Ricky Canatoy nga hayan may namatay o samaron usab sa panig mga rebelde nga kauban sa magtiayong Manuelito alyas Mosong ug Merlyn Satur alyas Maya nga una na nang nadakpan sa miaging bulan.
Samtang wala ma-ambush apan engkuwentro ang natigayon tali sa Charlie Company sa 58th IB,Philippine Army ug CPP-NPA combatants nga nag-resulta sa pagbaton sa casualties sa duha ka panig sa Gingoog City,Misamis Oriental.
Kini ang pagpamugos ni 4th ID spokesperson Maj Francisco Garello Jr bisan kon napatya’g usa ka sakop ang tropa ni 58th IB commander Lt Col Ricky Canatoy sa engkuwentro kagahapon sa buntag.
Miingon si Garello nga kon nabanhigan pa ang ilang tropa,dili lang usa apan posibleng daghan pa ang madisgrasya sa hitabo.
Gidala sa Camp Evangelista ang patay’ng lawas ni Dalogdog aron hatagan sa taas nga pagtahod tungod sa dakong sakripisyo nga nahatag niini sa nasud.
