CAGAYAN DE ORO CITY – Samaran ang usa ka sundalo sa nahitabong engkwentro tali na sa mga rebeldeng New Peoples Army sa Magayad Creek, Brgy Pigsag-an ning syudad.
Gibutyag ni 403rd Brigade commander Brigadier General Edgardo de Leon nga na-engkwentro sa tropa sa 65th IB, PA ang napulo ka mga NPA nga gitoohang splinter group sa natigayon nga unang engkwentro sa Brgy Sabala Bantayao, Lumba Bayabao Lanao del Sur.
Milungtad sa 10 ka minutos ang panagsinukliay sa mga bala nga gikaangol sa usa ka sundalo. Nagtoo usab si De Leon nga adunay casualty sa panig sa mga NPA tungod sa lama sa mga dugo nga ilang nakita sa firing line.
Samtang gihupay ni 403rd Brigade commander Brigadier General Edgardo de Leon ang kabalaka sa publiko sa natigayon nga engkwentro sa militar ug mga rebeldeng New Peoples Army o NPA sa Magayad Creek, Brgy Pigsag-an ning syudad.
Miingon si De Leon nga layo ang posibilidad nga may mga sibilyan nga maangin tungod kay natigayon ang engkwentro sa pinakabukid nga bahin sa dakbayan.
Masaligon usab si De Leon nga dili makanaug padulong sa syudad ang mga terorista tungod kay dugay na sila nga gideklara nga persona non-grata sa mga residente sa maong barangay.
Samtang nakaalerto ang Cagayan de Oro City Police Office COCPO nunot na sa nahitabong engkwentro tali militar ug rebeldeng New Peoples Army o NPA sa Magayad Creek, Brgy Pigsag-an ning syudad.
Kini ang gihimong kumpirmasyon ni City Police director Police Col. Henry Dampal sa pakighinabi sa Bombo Radyo.
Si Dampal miingon nga hugot ang koordinasyon sa kapulisan ug militar sa pagseguro nga dili makasulod sa syudad ang mga nakasibat nga terorista.
Masaligon si Dampal nga dili makaapekto sa kahusay ug kalinaw sa syudad ang natigayon nga engkwentro sa militar ug kapulisan sa Barangay Pigsag-an nga gikaangol sa usa ka sundalo.
Samtang gipasaka ni acting City Mayor Girlie Balaba ang usa ka team gikan sa city hall aron masuta ang kondisyon sa pipila ka pamilya nga namakwit dihang nag-engkuwentro ang militar ug NPA sa Brgy Pigsaga-an ning syudad kagahapon sa hapon.
Kini human kumpirmaha sa brgy kapitan sa maong lugar nga may mga residente nga namakwit aron dili maipit sa maong kagubot.
Namahayag si Balaba nga dili lamang angay mabalaka ang katawhan kay kontrolado sa kapolisan ug militar ang lihok sa mga rebelde nga napadpad sa bukirang bahin sa syudad.
