CAGAYAN DE ORO CITY – Kasuhan sa pagpanulis ug illegal nga pagpabuto sa armas ang aktibong sundalo ug laing upat ka sibilyan nga suspek sa hijacking sa duha ka cargo vehicles sa Upper Puerto ning syudad sa miaging kadlawon.
Giila ni Puerto Police Station commander Capt Ron Baba ang dinakpan nga si Army Cpl Manolo Tilap,50 anyos,taga-Brgy Balubal sa syudad ug aktibong na-destino sa 403rd IB,Philippine Army nga nakabase sa Bukidnon.
Nasikop usab sila si Pedro Torion,Jeff Abanel,Mark Anthony Bastatas,Radian Arpisa nga pulos residente sa Upper Puerto sa syudad.
Miingon si Baba nga pasaka ang mga sakyanan dihang gihimo sa mga suspek ang kremin diin nakuha ang pipila ka mga kargamento niini.
Gilayong naka-responde ang mga pulis rason nadakpan ang mga suspek.
Samtang dili modupa ang militar sa robbery hijacking sa ilang kauban sa Brgy Puerto ning syudad.
Gibutyag ni 403rd Brigade Philippine Army commanding officer Col. Ferdinand Barandon nga ila na lamang itugyan sa kapolisan ang pagkaso batok kang Army Cpl Manolo Tilap nga kabahin sa nang-hijack sa Upper Puerto sa syudad.
Gipaniguro usab ni Barandon nga matangtang si Tilap sa serbisyo kon makit-ang sad-an sa kasong administratibo nga iyang atubangon sa military court martial proceedings.
Si Tilap ang unang gitambagan sa heaquarters nga mo-retiro na lamang tungod sa giatubang usab niining suliran sa trabaho sulod na sa 26 ka tuig.
