CAGAYAN DE ORO CITY- Gidudahan sa kapolisan nga anggulo sa ‘love triangle’ ang rason sa pagpusil-patay sa sundalo nga igo ra namisita sa iyang hinigugma sa lungsod sa Wao,Lanao del Sur.
Giila ni AFP’s 5th IB commander Lt Col Romulus Rabara ang iyang sundalo nga si Cpl Arnasil Esmael,legal ang edad ug lumad nga residente sa Jolo,Sulu.
Saysay ni Rabara nga anaa sulod sa kusina ang biktima sa pinuy-anan sa iyang hinigugma dihang kalit pusila sa dughan sa wala ilhing mga suspek hinungdan gidali pagdala sa ospital.
Apan wala na matabang ang biktima diin narekober sa crime scene ang pito ka kapsula sa kalibre 9mm ug caliber .45 govt issued pistol.
Gibutyag usab ni Wao Police Station investigator Sr Master Sgt Mark Ariel Macana nga daghan anggulo ang gitutukan nila sa hitabo diin naglakip sa bangi sa gugma.
