Nagsaka pa ang ihap sa mga biktima sa sunog nga miigo sa Barangay Lapasan ug Saint John nga bahin sa Brgy. Puntod ning syudad niadtong Abril 20 alas 10:45 sa gabii.
Sumala ni Salome Agabe, Child Development Teacher Coordinator sa Brgy. Lapasan, gilaumang mosaka pa ang ihap sa kasamtangang numero nga mokabat na sa 245 ka pamilya o 384 ka indibidwal nga naapektuhan sa maong insidente.
Giingon usab niya nga apil niini ang 34 ka senior citizens, 5 ka buntis, 3 ka persons with disability, ug 23 ka masuso nga temporaryong gipapuyo karon sa evacuation center sa barangay.
Dugang pa niya, ang maong sunog nakaapekto sa mga kabalayan sa Lapaz 1 Extension ug San Isidro Labrador sa Lapasan ug nakaabot usab sa boundary area sa Barangay Puntod.
Hisayrang mulapad sa usa ka hektarya ug kapin 100 ka panimalay ang naapektuhan sa maong sunog, diin nakatala usab og usa ka casualty.
Sa pagkakaron, padayon ang paglista ug pag-monitor sa mga apektadong residente samtang nagpadayon ang koordinasyon sa mga lokal nga awtoridad alang sa dugang tabang ug kahapsay sa evacuation sites diin nahimutang ang mga biktima.
