Gipasamot sa nagpadayon nga sunog sa kalasangan ug mga yutang peatland sa Indonesia ang polusyon sa hangin sa Southeast Asia, nga grabeng nakaapekto sa Singapore ug Malaysia sa miaging semana.
Tungod sa makadaot nga aso, misaka sa 283,270 ang natala nga mga kaso sa mga problema sa pagginhawa sa 7 ka probinsya sa Indonesia hangtod Oktubre 13, kapin sa doble kumpara sa 113,336 ka kaso niadtong Septiyembre 9.
Niadtong Oktubre 14, miabot sa 284 micrograms kada cubic meter ang lebel sa PM2.5, o gagmayng partikulo sa polusyon sa hangin, sa kasadpang bahin sa Singapore, ang pinakataas nga natala niini karong tuiga.
Tungod sa grabeng polusyon, gisuspinde sa East Timor ang face-to-face nga klase sulod sa 3 ka adlaw sugod kagahapong adlawa, samtang gipasirado usab ang mga eskwelahan sa pipila ka estado sa Malaysia.
Samtang, gisaway ang gobyerno sa Indonesia tungod sa pagdumala niini sa sunog ug sa pagpanuko sa pagdawat sa tabang gikan sa mga silingang nasod aron mapugngan ang paglapad sa maong sunog. (jane abulag)
