CAGAYAN DE ORO CITY – Putol na ang suplay sa tubig sa Cagayan de Oro Bulk Water Incorporated o COBI padulong sa Cagayan de Oro Water District o COWD sa pipila ka barangay sa unang distrito sa syudad.
Gikompirmar ni Metro Pacific Water senior legal counsel Atty. Roberto ‘Rob’ Rodrigo pinaagi sa interbyu sa Bombo Radyo nga nauyunan nila sa Rio Verde Water Consortium Incorporated nga putlon na ang suplay sa tubig alang sa COWD kay pabiling wala makabayad sa ilang obligasyon sa kontrata.
Namahayag si Rodrigo nga gihatag na nila ang tanang pabor sa COWD aron sulbaron ang ilang obligasyon apan pabiling nagmagahi sila sa pagsulbad niini.
Dumduman nga gipaubos ni City Mayor Rolando ‘Klarex’ Uy sa state of emergency ang sitwasyon sa panubig sa service area sa COBI-COWD tungod sa maong bahad.
Una nang namugos ang COWD management nga subay sa ilang book of accounts,pirmi sila makabayad sa obligasyon niini sa COBI gawas lamang sa gipangugat nga sobra 700 milyones pesos nga peligro makaipit kanila sa Commission on Audit.
Apan gipasalig sa MetroPac-COBI nga pabilin sila nga bukas sa negosasyon sa COBI aron masulbad ang ilang disputed payable collections.
