Gipaniguro sa National Irrigation Administration (NIA) nga igo ang suplay sa tubig sa mga dagkong dam sa nasud aron matabangan ang sektor sa agrikultura taliwala sa posibleng epekto sa El Niño.
Sumala ni Engr. Eduardo “Eddie” G. Guillen, puno sa tubig ang Magat Dam nga makahimo sa pagpatubig sa kapin 90,000 ka ektarya nga umahan, samtang andam usab ang Pantabangan Dam alang sa iyang 140,000 ka ektaryang service area.
Giingon usab niini nga puno gihapon ang San Roque Dam, nga makadugang sa kasigurohan sa suplay sa tubig alang sa mga mag-uuma.
Dugang pa, adunay mga nahuman ug nagpadayon nga solar pump irrigation projects sa nagkadaiyang bahin sa nasud aron mapalig-on ang kapasidad sa irigasyon ug makatubag sa mga hagit sa panahon.
Gibutyag sa ahensya nga, mas maayo ang kahimtang sa suplay sa tubig karon kumpara sa naunang El Niño niadtong 2023 base sa ilang pagtan-aw ug koordinasyon sa mga ahensyang nagdumala sa mga water resources.
