(Update) CAGAYAN DE ORO CITY- Giagi karon sa Bombo Radyo Philippines sa local government unit
(LGU) Surigao City ang ilang paghangyo direkta ngadto sa nasudnong kagamhanan nga sila
maagak-patindog gikan sa trahedya nga miagi sa katawhan niini.
Kini human gibati ni Surigao City Vice Mayor Atty Alfonso Casurra ang ilang dinalian nga
pagpanginahanglan ilabina nga unta sila mapadala’g mg enhenyero nga may igo ang kaalam sa mga
gambalay nga apektado sa 6.7 magnitude nga linog.
Miingon si Casurra nga daghan sa ilang mga government ug commercial buildings ang apektado sa
linog hinungdan angay mapadali ang pag-assess niini kon mahimo pa ba kini nga gamiton o dili na.
Gipadayag kini nga kabalaka ni Casurra tungod kay sunod-sunod ang aftershocks nga peligro
mopatumba sa ubang gambalay nga daan nang apektado sa linog.
Gani,gikompirmar usab niya nga may grupo sa mga ehenyero nga gikan sa Cagayan de Oro City ang
modangat na sa ilang syudad alang sa maong katuyuan.
Hinoon,wala nila gisalindot ang ubang mga ayuda sama sa relief goods kay gikinahanglan gihapon
kini sa ilang katawhan bisan anaa na sila sa state of calamity.
Giangkon ni Casurra nga bugtong sa Bombo Radyo Philippines lamang nila makuha ang updated nga
mga balita bahin sa linog hinungdan nga nakatutok sila pagpaminaw niini.
Sa pikas bahin,nahidangat na grupo sa search and medical teams gikan sa City Disaster Risk
Reduction and Management Department o CDRRMD nga gipadala sa Cagayan de Oro City alang sa
Surigao City.
Gibutyag ni CDRMMD officer Allan Porcadilla nga anaa sa 25 ka personahe nga puno sa kaalam ang
ilang gipadala sa maong syudad aron mohimo’g assessment nga basehan nga mopadala’g ayuda ang
CdeO-LGU.
Si Porcadilla miingon nga nagsumikad ang mando gikan ni City Mayor Oscar Moreno kinsa mibati
usab sa kabalaka ngadto sa katawhan sa Surigao City.
Pahayag pa ni Porcadilla nga lab-as pa sa pangisip ni Moreno ang pag-atubang sa nagkadaiyang
local government units niadtong libuang pamilya usab ang gisabwan sa tubig-baha gumikan sa pag-
ulan sa miaging Enero 16 ug 28 ning tuiga.
Samtang,tigumon usab ni Misamis Oriental Governor Bambi Emano ang technical group ug ang
Provincial Disaster Risk Reduction and Management Office o PDRRMO.
Kini aron matuki ug maandam ang ila usab nga matunol nga ayuda ngadto sa katawhang apektado sa
linog sa maong probinsya.
Si Emano misulti nga dili mahimo nga igo lamang sa pagpiyong ang katawhan sa probinsya ilabina
nga silingan lamang sa Misamis Oriental ang Surigao City nga nakabase sa Caraga Region.
Nasayran usab nga tungod sa grabeng kadaot sa pagtay-og sa linog,bisitahon ni Presidente Rodrigo
Duterte kuyog ang iyang cabinet officials ang katawhan sa Surigao City ning adlawa.
Dumduman nga anaa na sa 7 ka tawo ang kumpirmadong namatay samtang halos 200 ang samaron
diin ang uban kanila gipangdala sa nagkadaiyang ospital dinhi sa Mindanao.
