Gihaghit ni kanhi Oro Chamber President Ray Talimio Jr. ang kagamhanan nga ipabilin gayud sa Mindanao ang surplus sa kuryente ug dili ibaligya sa Visayas taliwala sa nagpadayong bahad sa shortage gumikan sa pagpalya sa Unit 2 sa GNPower Kauswagan coal-fired power plant ug ang subling paggawas og Yellow Alert sa NGCP.
Gipasidaan sa lider sa negosyo nga dako ang posibilidad nga mag-brownout sa rehiyon kon ibalhin sa pikas isla ang 200 hangtod 500 megawatts nga enerhiya samtang gi-reparar pa ang mga planta.
Gipakita matod pa sa datos nga nakatala na og kakulangon nga 100 hangtod 300 megawatts sa suplay sa kuryente sugod karong bulana hangtod sa Disyembre.
Tungod niini, gipamugos sa opisyal nga kinahanglang ipatuman ang pagpaundang sa mga coal power plant pag-abot sa tuig 2030 aron makabalhin na sa mas kasaligan nga renewable energy ang Mindanao.
