Gikwestyon ni Atty. Jeryll Harold Respicio, usa ka CPA-lawyer ug petitioner sa Supreme Court, ang migula nga survey nga nagpakita nga mayorya sa mga Pilipino ang uyon sa impeachment batok kang Vice President Sara Duterte.
Matud niya, dili angay nga ibase lamang sa survey ang tinuod nga sentimyento sa katawhan tungod kay dako ang impluwensya sa media ug social media sa paghulma sa opinyon sa publiko.
Dugang pa niya, ang mas realistiko nga sukdanan sa pagbati sa katawhan makita sa mga viral nga posts, komento, ug engagement sa social media nga nagpakita sa direkta nga partisipasyon sa publiko.
Gipasabot usab niya nga adunay posibilidad nga ang ubang resulta sa survey maapektuhan sa kasamtangang diskurso sa media, nga mahimong dili hingpit nga nagrepresentar sa tanang sektor.
Sa karon, nag-awhag siya nga tan-awon ang mas lapad nga hulagway sa opinyon sa katawhan samtang nagpadayon ang isyu sa impeachment sa bise presidente.
