CAGAYAN DE ORO CITY – Patay ang usa ka suspek nga may kasong frustrated murder human misulay pag-ikyas sa kamot sa mga otoridad samtang sakay sa patrol car sa Don Carlos Municipal Police Station, kagahapon sa hapon.
Naila ang suspek nga si Joseph Saba, 26 anyos.
Namahayag si Police Major Sebastian Chua, hepe sa Don Carlos MPS nga human na file ang kaso sa suspek sa Provincial Prosecutors Office sa Malaybalay City, kalit kining misipa sa mga pulis nga mi-gwardiya kaniya sakay sa mahindra patrol car.
Bisan gihuptan sa mga kapulisan, misulay gihapon sa pag-ambak ang suspek ug naguyod sa patrol.
Nakahiagom sa grabeng samad sa ulo ang suspek nga naghikog hinungdan sa iyang kamatayon.
Gidala ang suspek sa labing dool nga ospital apan gideklarar kining patay na ni Dr Marvin Cabigas sa Bukidnon Provincial Hospital sa Maramag.
