CAGAYAN DE ORO CITY – Hawid na sa Davao City Police Office ubos sa Police Regional Office 11 ang duha ka suspected kidnappers ug ang naluwas nga tulo ka biktima nga unang naharang sa kapolisan sa Valencia City Police Station sa Valencia City,Bukidnon sa miaging semana.
Miingon si Police Regional Office 10 spokesperson Police Maj. Joann Navarro nga mas paborabli ang PRO-11 nga mohawid sa kaso kay mismo sa ilang tugkaran ang natigayong pagpangdagit.
Giila ang mga naluwas nga mga biktima nga sila Rodrigo Rosello Mangyao, 61 anyos; Samuel Mabilao Logan Jr,33 anyos nga pulos taga-Davao region ug Jovanne Katahosan Layuan, 28 anyos nga taga-Maramag, Bukidnon.
Siya miingon nga maoy nadakpan sa Valencia City PNP ang mga dinakpan nga sila Renie Labaho Endroga, 30 anyos; ug Nelson Mantuhac Capangpangan nga pulos nagpuyo sa Agusan del Sur.
Nasuta nga nasuko ang mga suspek kay nailad sila sa gold buying scam rason nga pugsanon nila gipangdagit ang mga biktima padulong dinhi sa Northern Mindanao hinungdang nadakpan pag-agbot sa Bukidnon.
