CAGAYAN DE ORO CITY-Napatay sa hiniusang operasyon sa PDEA-13 ug PDEA-10 ang lider sa Sangcopan Drug Syndicate sulod sa safehouse niini diha sa Brgy Kauswagan sa syudad kagahapon sa hapon.
Kini human giingong misukol ang suspected druglord nga si Jabbar Sangcopan gamit ang kalibre 357 sa mga personahe sa PDEA-13 nga mipatuma’g search warrant sulod sa iyang pinuy-anan.
Si PDEA 13 regional director Gilbert Buenafe miingon nga si Sangcopan ang usa sa labing dako nga shabu supplier sa Caraga Region nga 10 ka tuig nang gisunod-sunod sa mga otoridad.
Gidali pagdala si Sangcopan sa J R.Borja City Memorial Hospital apan deklaradong dead on arrival.
Nakuha sa pinuy-anan ni Sangcopan ang 50 gramos nga shabu diin may bana-banang nagbalor 500-mil pesos.
Nasikop usab ang kapikas ni Sangcopan nga si Nasif Asgar Sangcopan nga may warrant of arrest sa korte sa Caraga.
Samtang mosugot ang pamilyang Sangcopan nga mahurot kamatay mapamatud-an lamang nila nga sila wala malambigit sa pagbaligya’g droga sa pipila ka bahin sa Mindanao.
Kini ang pagpangugat sa anak sa napatay’ng suspected druglord Jabbar Sangcopan nga si Yusoph diha Brgy Kauswagan sa syudad kagahapon.
Miingon ang batan-ong Sangcopan nga nagbaton sila sa pipila ka kabtangan tungod sa gidumala sa ilang pamilya nga lapad nga kaumahan sa Marawi City.
Nabawi usab sa hiniusang operasyon sa PDEA-13,PDEA-10 ug Opol Police Station ang balor half-million ka pesos nga suspected shabu sa laing kapikas ni Jabbar Sangcopan diha sa Brgy Barra,Opol,Misamis Oriental.
Kini human gisilbi nila ang search warrant nga gilugwa ni RTC Branch 18 Executive Judge Dennis Alcatar sa pinuy-anan ni Cindy Shariff Sangcopan sa maong lugar.
Namahayag si PDEA -10 agent Isko nga nabawi usab gikan sa suspek ang usa ka unit sa Nissan Navarra nga may plakang PQK 528.
Una niini,andam usab mamatay si Cindy mamatud-an lamang nga inosente kini sa pasangil sa mga otoridad batok kaniya.
