CAGAYAN DE ORO CITY – Gusto pa-imbestigaran ni 1st District Kag. Imee Moreno sa committee on environment sa konseho ang posibleng mismanagement sa pagpangulekta’g basura sa bag-ong kontraktor nga nakakuha’g minilyong kontrata sa dakbayan.
Kini human ubay-ubay’ng barangay ang nagpalanog sa ilang mga reklamo epekto sa pakyas makuha sa kontraktor rason nga naghatag sa kahugaw sa dakbayan.
Gisuta usab sa batan-ong Moreno ang kahimtang sa Pagalungan sanitary landfill diin nadiskobrehan nga daw susama na kini’g hitsura sa kanhi basurahan kaniadto sa Upper Zayas,Brgy Carmen sa syudad.
Si Moreno ang gipahukasa’g duha ka komitiba sa konseho nunot sa banging politika ni City Mayor Rolando Uy ug mismo sa amahan niini nga si kanhi Mayor Moreno.
Samtang gipasalig ni committee on environment chairman Kag. Roger Abaday nga aksyon ang unod sa special report ni Moreno kabahin sa mga nagkatag nga basura sa pipila ka bahin sa syudad.
Miingon si Abaday wala siya’g dapigan sa maong isyu rason nga ipatawag niya ang kadagkuan sa maong kabarangayan ug mismong kontraktor sa basura.
Gikompirma usab sa konsehal nga dunay higayon nga dugay makuha ang mga basura apan angay usab mahibaw-an nga dunay pipila ka mga residente nga dili gatood sa oras o schedule sa pagpahimutang sa ilang mga hugaw sa designated garbage areas.
