CAGAYAN DE ORO CITY-Patay ang usa ka suspected drug pusher dihang giingong misukol sa kapolisan nga mihimo’g hiniusang anti-illegal drug operation sa Serenia Street,Brgy Carmen sa syudad kagabii.
Giila ang suspek nga si Rogen Cobar, 25 anyos,may kapuyo ug nagpuyo sa Brgy Igpit,Opol,Misamis Oriental.
Miingon si Cagayan de Oro City Police Office o COCPO spokesperson Supt Mardi Hortillosa nga dugay na sila nagpasidaan sa suspected drug pushers nga mohunong na sa ilang kalihukan aron dili mabutang sa peligro.
Dugang ni Hortillosa nga nasubo sila sa kamatayon ni Cobar kay tuyo nila nga mahunong ang illegal drug operations nga walay kinabuhi nga mausik.
Naigo si Cobar sa dughan gikan sa mga operatiba sa City Drug Enforcement Unit ug Carmen Police Station dihang gihimo ang operasyon.
Naigo usab ang usa ka pulis sa pagpusil sa suspek apan wala kini maunsa kay nakasul-ob sa bullet proof vest.
Nakompiskar sa crime scene ang suspected shabu,drug paraphernalia,kalibre 45 nga armas ug pipila ka fire cartridges sa crime scene.
