CAGAYAN DE ORO CITY – Nadakpan sa buhatan ni Cagayan de Oro 2nd District Cong.Rufus Rodriguez ingon man sa Department of Social Welfare and Development 10 ug Carmen Police Station ang gitudlong ‘runner’ sa suspected scammer sa entrapment operation sa pagsindikato sa cash asssitance release sa pipila ka kabus nga katawhan sa dakbayan.
Kini human unang nakadawat sa impormasyon ang buhatan sa kongresista hinungdang gilayong gi-koordinar sa chief of staff ni Cong.Rufus nga si Nazareth Punong Barangay Atty. Regine Rodriguez kang City Police Director Col.Salvador Radam aron ilusad ang operasyon.
Miingon si Carmen Police Station commander Major Mario Mantala Jr nga kinsa gi-alerto ni Radam nga gilayong nagtagbo ang tulo ka opisina aron han-ayon ang hiniusang operasyon batok sa mga sindikato.
Naaresto ang suspek nga si Melchor Antonio Rasalo,31 anyos nga taga,Calaanan,Brgy Canitoan samtang naka-eskapo ang pinaka-target nga si alyas Rene nga residente usab sa Brgy Lapasan ning syudad.
Gibutyag ni Mantala nga raket sa duruha nga mangdani sa pipila ka residente gamit ang gi-peke nga dokumento gikan sa buhatan ni Rodriguez aron ipakita sa DSWD 10 alang sa 10-mil pesos nga tabang-pinansyal.
Naka-release ang buhatan sa duha ka fake beneficiaries samtang ang nabiling dose ang napugngan na sa mga otoridad.
Nasuta nga mismo ang gipanghaylo nga kuwestiyonableng indigent beneficiaries ang igo lang hatagan sa tag-2-mil pesos samtang ang nabiling P8-K ang bahinon usab sa mga suspek.
Tungod niini, giandam na sa buhatan ni Rodriguez ang kasong falsification of documents nga maoy gamiton ni Mantala sa pagsang-at batok mga suspek sa piskalya ning syudad sunod semana.
