CAGAYAN DE ORO CITY – Nabalhog sa selda ang amahan nga akusado paglugos sa kaugalingong anak sa daghang higayon sa lungsod sa Villanueva,Misamis Oriental.
Kini human silbihi sa mga otoridad sa arrest warrant ang akusado nga si alyas Mario,45 anyos nga nagpuyo sa lugar.
Matud ni Police Regional Office 10 spokesperson Major Joann Navarro nga nagsumikad ang pagsilbing top 6 most wanted person ni Mario kay nag-atubang kini sa qualified rape nga nasang-at sa usa sa mga korte sa lalawigan.
Subay sa impormasyon nga napahimungtan sa amahan ang anak dihang nagkabulag sila sa iyang asawa sa wala matug-an nga hinungdan.
Nadugayan pa ang pagtug-an sa biktima ngadto sa iyang uyuan tungod sa bahad nga adunay dautang mahitabo kaniya.
Gitakdang dad-on sa provincial jail ang akusado aron dunggon ang kasong giatubang niini sa korte.
Sa kasamtangan,ubos sa pag-atiman sa DSWD 10 ang anak tungod sa kalisang nga gibati niini epekto sa buhatan sa iyang amahan.
Dugtong niini,gipahalipayan ni PRO 10 regional director Brig Gen Jaysen De Guzman ang ilang lower units nga maoy nagkugi nga makuha sa hingpit ang akusado.
