CAGAYAN DE ORO CITY-Patay ang wanted person samtang dead on arrival usab ang sacristan nga nadamay atol sa pinusilay nga natigayon sa Sitio Cala-Cala,Brgy Cogon,Balingasag,Misamis Oriental kagahapon sa hapon.
Giila sa kapolisan ang target person nga si Baldomiro Pajo,hingkod ang panuigon,minyo ug nagpuyo sa lungsod sa Jasaan ning lalawigan.
Miingon si Misamis Oriental Provincial Police Office Director Sr/Supt Rolando Destura nga gisilbi sa kapolisan ang warrant of arrest tungod sa kasong pagpangawat sa suspek apan wala kini magpadakop ug giingong nakig-pinusilay gamit ang kalibre 45 nga armas.
Gigukod sa tulo ka unit sa kapolisan si Pajo hinungdan giignong napusilan niini ang 16 anyos nga si Nico Camajalan kinsa kamulong tan-aw sa telebisyon sa silingan atol sa hitabo.
Si Pajo ang gikaintapan nga tigpahuyot sa gidiling droga ug nagsilbing ‘hitman’ sa mga drug pusher nga dili makabayad ngadto sa ilang grupo.
Si Pajo ang mitahan sa kapolisan kaniadto human matudlo nga usa sa mag suspek mi-ambush kang chief of anchors Bombo James Licuanan sa Bombo Radyo ning syudad niadtong Nobyembre 24,2012.
Samtang nangayo’g hustisya ang pamilya sa nadamay nga menor de edad nunot sa pinusilay tali sa kapolisan ug wanted person diha sa Sitio Cala-Cala,Brgy Cogon,Balingasag,Misamis Oriental.
Kini dili madawat sa inahan nga si Aida Camajalan ang gidangatan sa ika-unom nga anak nga si Nico,16 anyos dihang naigo sa dughan atol sa pagpinusilay sa kapolisan batok napatay nga si Pajo kagahapon sa hapon.
Miingon si Gng Camajalan nga mangayo sila’g tabang kang Balingasag Mayor Marrietta Roa-Abogado ug Gov Bambi Emano aron kahatagan sa hustisya ang nahitabo sa ilang anak kinsa sakristan pa sa simbahang Katolika sa maong lungsod.
Si Camajalan ang dead on the spot dihang miabot sa pagginukdanay si Pajo ug ang kapolisan sa balay diin igo lamang nanglantaw sa telebisyon kagahapong adlawa.
