CAGAYAN DE ORO CITY – Nadakpan ang usa sa mga suspek pagpanulis sa 7 Eleven convenience store nga unang natigayon sa Upper Balulang sa syudad.
Kini human natumbok sa kapolisan ang lokasyon sa pinuy-anan sa gitoohang suspek nga si Dexter Langga,20 anyos,ulitawo nga lumad taga-Davao City ug nagpuyo sa Upper Balulang.
Gibutyag ni Carmen Police Station commander Maj Peter Tajor nga gidakop si Langga pinasikad sa warrant of arrest tungod sa kasong kriminal nga pending sa korte.
Namugos si Tajor nga positibo nga gitudlo sa kahera ang suspek nga mitulis kaniya ug mikuha sa 30-mil pesos nga kinitaan sa miaging semana.
Samtang gihimakak sa suspek nga si Langga ang pasiatab sa PNP nga nalambigit siya sa pagpanulis sa convenience store diin nadala ang 30-mil pesos nga kinitaan niini sa miaging semana.
Gibutyag ni Langga nga wala siya sukad nalambigit sa pagpanulis ug talagsa ra usab kini mogawas sa balay aron mag-internet.
Gani,giklaro sa tag-iya sa maong tindahan dili siya ang nakit-an sa CCTV ug sukwahi sa gisulti sa kapolisan.
Hinoon,giangkon niini nga may kaso siya nga giatubang sa korte.
