CAGAYAN DE ORO CITY – Nadakpan sa kapolisan sulod sa iyang gitrabahuan ang suspek sa pagpatay usa ka sex worker diha sa Homewood Pension House sa Zone 4, Barra, Opol, Misamis Oriental.
Giila ni Opol Municipal Police station commander Major Evary Bacunawa ang suspek nga si John Michael Alfeche, 25-anyos ug residente sa Brgy Luyong Bonbon, Opol ning lalawigan.
Gibutyag ni Bacunawa nga napatay sa suspek ang biktima nga si Samera Pangkatan Marayan nga taga Brgy Gasi,Laguindingan human siya pangayu-i sa P5,000 nga bayad gikan sa P1,500 nga ilang gikasabutan.
Detinado na sa bilangguan ang suspek ug nag-atubang sa kasong murder.
Samtang gipamugos ni Alfeche nga dili tinuyo ang iyang pagpatay sa sex worker nga si Samera Pangkatan Marayan.
Giangkon ni Alfeche nga iyang giggapos ang biktima ug gitabunan sa unlan ang dagway niini aron dili makasunod kaniya nga paggawas na sa motel.
Siya miingon nga nataranta siya dihang gipangayoan siya’g dugang bayad sa biktima sukwahi sa ilang gisabutan.
Kahinumduman nga gibiyaan ni Alfeche ang biktima bandang alas 3:00 sulod sa room 46.
