Paspas nga nadakpan sa pwersa sa Manticao Municipal Police Station ang usa ka 35 anyos nga suspek human sa 15 ka minuto sukad sa pagtaho bahin sa pagpanigbas sa usa ka senior citizen sa Purok 9, Sitio Sambuyaan, Barangay Pagawan sa Manticao, Misamis Oriental.
Gisundan kini sa pagkatugyan sa barangay Captain ngadto sa mga awtoridad sa 16 ka pulgada nga sundang nga maoy gituohang gigamit nga hinagiban sa maong krimen.
Agi og tubag sa maong kalampusan, gidayeg ni Misamis Oriental Police Provincial Office Director Police Colonel Al Abanales ang maayong koordinasyon sa komunidad ug kapolisan nga misangpot sa hinali nga pagkasakmit sa suspetsado.
Labaw pa niini, gipasalig sa maong opisyal nga magpabilin silang matngon ug determinado sa pagpanalipod sa kinabuhi ug pagpadayon sa walay pinalabi nga imbestigasyon aron mapahamtang ang hustisya.
