CAGAYAN DE ORO CITY-Nadawat na sa kadagkuan sa Rural Transit Mindanao Incorporated o RTMI ang preventive 30 days suspension order sa Land Transportation Franchising and Regulatory Board o LTFRB-10.
Sumala ni RTMI-Yacapin Branch Manager Jessie Boy Lentorio nga ilang nadawat ang kamanduan kagahapong adlawa.
Gibutyag niini nga tungod sa maong suspension, mas gipahugtan pa nila ang ilang pahimangno sa drivers nga mag-amping sa pagmaneho aron makalikay sa aksidente.
Hisayran nga gisuspenso sa LTFRB ang bus human malambigit sa aksidente diin tulo ka tawo ang patay samtang laing 28 ang samaron sa Brgy Patpat, Malaybalay City, Bukidnon.
Gitin-aw usab ni LTFRB regional director Allan Guro nga upat lamang ka bus sa RTMI ang ilang gipaubos sa preventive 30 days suspension.
Siya miingon nga kadto lamang bus nga gabiyahe sa Cagayan de Oro paingon Valencia City ang ilang gidid-an nga makabiyahe.
Kini ang gihimong aksyon sa ahensiya nunot na sa dugoong aksidente nga gikalambigitan niini.
Una nang miggawas sa imbestigasyon sa Malaybalay City Police Office nga nawad-a’g balanse ang drayber sa bus tungod sa gilikayan nga pedestrian nga mitabok sa dalan hinungdan nga nahulog kini sa pangpang sa maong lugar.
Dugtong pa ni Guro nga posibleng maminusan ang gipahamtang niyang preventive 30 days suspension kun ugaling matagbaw sa tubag kung nganong nahitabo ang maong aksidente.
Sumala ni Guro nga iya usab ipaubos sa drug test ang drayber sa bus ug may himoon silang training and seminars.
Una nang gihataga’g ayuda sa bus company ang pamilya sa mga namatay ug anaa na lamang sa 6 ka pasahero gikan sa 28 nga naangol ang nagpabilin sa ospital.
