Gihatag na sa lokal nga gobyerno ang discretion sa mga tunghaan, mapa-publiko man o pribado, kon magpatuman ba kini og suspension sa klase subay sa duha ka adlaw nga forecast sukad kagahapon hangtod karong adlawa diin gilauman nga mosaka sa 41 hangtod 42 degrees Celsius ang heat index nga anaa na sa delikado nga lebel.
Gipadayag ni City Disaster Risk Reduction and Management Department Head Nick Jabagat nga adunay kaugalingong pamaagi ang matag eskwelahan sa pagpahiuyon sa ilang learning system batok sa epekto sa kainit.
Tungod niini, gipahinumdoman ang mga tagdumala sa eskwelahan sa pagpabiling mabinantayon alang sa kaluwasan ug sa kaayohan sa mga estudyante.
Hinoon, nagpabilin nga andam ang buhatan sa paghatag og dugang pahimangno ug suporta aron maseguro ang kaluwasan sa tanan sa tibuok syudad.-
