CAGAYAN DE ORO CITY – Gipa-imbestigaran ni outgoing Association of Brgy Council o ABC president ug incoming 2nd District City Councilor Alam Lim sa duha ka komitiba sa konseho si Gusa Brgy Kapitan Marlo Tabac.
Kini gumikan sa isyu sa kurapsyon nga giatubang ni Tabac sulod sa iyang brgy ug mismo sa Liga ng Kapitanes sa Pilipinas-Cagayan de Oro chapter.
Kini ang unod sa special report nga gibatbat ni Lim diin siya nahingawa sa mopuli kaniya sa ABC kay nag-atubang sa alegasyon si Tabac nga mao unta’y mohulip kaniya subay sa lagda sa liga.
Una niini,namugos si Tabac nga dakong illegal ang gihimon pagpapapha sa mga alyado ni Lim kaniya kay kasupakan kini sa ilang constitution and by-laws sa hugpong sa kapitanes sa syudad.
Sumpay niini,giprangkahan ni Kag. Edgar Cabanlas nga nagsilbing lider sa mayoriya sa konseho nga dili madali-dali ang pagtuki sa gipalanog nga akusasyon ni Lim batok kang Tabac.
Siya miingon nga wala na’y higayon nga matuki pa ang maong isyu sa kasamtangang konseho apan sa pagsulod na sa 20th council sa sunod semana.
Miingon si Cabanlas nga may higayon pa nga moduso ang tukma nga reklamo isip pagsunod sa proseso sa maong yangu-ngo sa mga kapitanes nga dapig sa pagpapha sa katungdanan ni Tabac sulod sa liga.
Hisayrang tipik sa pasangil ni Lim kang Tabac ang paggamit personal sa mga tseke sa brgy,langan pagsuweldo sa iyang mga empleyado ug kabahin sa pagpalihok sa pondo alang sa Sangguniang Kabataan/SK.
