CAGAYAN DE ORO CITY – Nakahurar na atubangan ni City Mayor Klarex Uy si Association of Brgy Council-Cagayan de Oro chapter president ug Gusa Brgy Kapitan Marlo Tabac ning syudad kaganihang buntag.
Kini igo paghuman sa flag raising diin gihataga’g rekognasyon ni City Vice Mayor Jocelyn ‘Bebot’ Rodriguez ang mayoriyang molangkob sa 21st city council nga magsilbing kaabag sa mga programa ingon mga serbisyo ni Klarex sa dakbayan.
Igo paghuman sa kalihukan,miduol si Tabac kang Klarex aron ipahurar kini sa iyang pagka-presidente sa ABC-CdeO chapter diin wala balibari ug gihimo sulod sa buhatan sa mayor.
Una niini, mikaylap ang taho nga hawid na ni Tabac ang certificate of confirmation gikan sa Liga-National aron opisyal kining ilhon nga pangulo sa mga kapitanes rason motambong na siya sa 21st city council regular session isip ex-officio member sa konseho sa dakbayan.
Ikakuyog niya sa konseho si kanhi ABC-CdeO chapter president ug District 2 City Councilor Alam Lim nga maoy mi-aksyon sa giingong petisyon sa loss of trust and confidence sa 64 ka kapitanes aron ipalagpot siya sa katungdanan isip bise-presidente niadtong Hunyo 5.
Kini ang ikaduha nga pagpanumpa ni Tabac kay una na siya mihurar pag-asyumar pagka-presidente sa liga atubangan ni Brgy 18 Kapitan Rey Rivera sa miaging semana.
Dumduman nga una nang namahayag si Klarex sa bag-o pa mibuto ang isyu nga dili manginlabot sa ABC ug wala sa ilang tinguha nga ipasulod pa si Carmen Punong Brgy Kikang Uy.
Hisayrang una nang namahayag si Tabac nga mohurar usab kini atubangan ni VM Rodriguez isip paghatag respeto sa konseho sa syudad.
