Gipasalig sa Police Regional Office 10 ang dinalian nga tabang alang sa pamilya ni Police Senior Master Sergeant Shelvib Cabug nga namatay human nabanggaan sa usa ka Mitsubishi Xpander samtang nagpatuman og checkpoint sa Jimenez, Misamis Occidental.
Matod pa sa tigpamaba nga si Police Major Joann Navarro, magdumala ang ilang buhatan sa paghikay sa libreng edukasyon ubos sa Napolcom scholarship program alang sa mga nabiling anak sa namatay nga pulis.
Dugang pa ni Major Navarro, nagpabilin ang ilang dako nga moral ug pinansyal nga suporta sa pamilya samtang ilang gipahinumdoman ang publiko bahin sa dakong peligro nga gi-atubang sa mga pulis sa matag adlaw nilang pagpanalipod sa komunidad.
Pinaagi niining mga benepisyo ug bulanong pensyon, naglaum ang kapolisan nga makuhaan ang bug-at nga kalisod ug kasubo nga gi-atubang sa pamilya ni Sergeant Cabug.
