Gihanyo ni Kabataan Patylist. Representative Renee Co ang gobyerno nga mas tutokan ang pag-atubang sa mga isyu sa katilingban nga nagpalisod sa kinabuhi sa mga pamilya ug kabatan-onan, imbes nga ibutang ang sala sa bag-ong henerasyon nga sila huyang o dali ra ma depress.
Ang pahayag kabahin sa iyang reaksyon sa giingon ni Senador Robin Padilla nga mas mahuyang emosyonal ang kabataan karon ug dali ma-depress kompara sa miaging henerasyon.
Gipasiugda ni Co nga nag-atubang ang kabataan karon sa educational crisis, kakulang sa trabaho, ug nagkataas nga presyo sa mga palaliton nga nakaapekto sa ilang panginabuhi ug kaugmaon.
Tungod niini, dili angay nga tawgon silang mahuyang kon makasinati og depresyon o anxiety, kay adunay personal ug sosyal nga hinungdan ang mental health concerns.
Gidugang niya nga kon nagkadaghan ang kaso sa depresyon ug nagkataas ang insidente sa suicide sa nasud karong panahona, posible nga adunay mas lawom nga problema sa sistema nga kinahanglan tubagon sa gobyerno. (James Oliver)
