CAGAYAN DE ORO CITY – Dili mominus sa 14 ka balay ang naugdaw sa pag-ulbo sa dakong sunog diha sa Sitio Seaside, Kolambog, Brgy. Lapasan kaganinang buntag.
Gibutyag ni Fire Inspector Samson Velarde sa Cagayan de Oro Fire District Office nga basi sa ilang imbestigasyon, nagsumikad ang kalayo sa lawak sa ikaduhang andana sa panimalay ni Isagani Salisi.
Apan ila pang gisuta kon unsay hinungdan sa pag-ulbo sa kalayo.
Paspas matud pang mikaylap ang kalayo sa mga silingang panimalay kay pulos kini gama sa light materials.
Gikompirmar usab ni Velarde ang pagkamatay ni Salisi kay posibleng na-suffocate kini human wala gilayon nakagawas sa nasunog niining balay.
Giingong ubos sa impluwensiya sa makahubog nga ilimnon si Salisi sa dihang nahitabo ang sunog. Gibana-banang 1.4 milyones ka pesos ang ‘structural damage’ sa maong sunog.
