Ipang-apud-apud na ang subsidiya nga tag P5000 ngadto sa dul-an 1,500 ka mga rehistradong motorela drivers sa lungsod sa Cagayan de Oro.
Gibutyag ni City Information Officer Jade Adeser nga himoon ang distribusyon sa ayuda sa City Hall Quadrangle, ug ang tibook parke sa City Hall.
Miingon si Adeser nga target nilang sugdan ang pag-apud sa ayuda sa alas 8 sa buntag, sa Abril 8, adlaw’ng Miyekules ug milaum nga mahuman ang kalihukan sa pagka-alas 6 sa hapon.
Lakip sa rekisitos nga ilang dad-on mao ang ilang Identification Card, drivers license ug dokumento nga nagpamatuod nga motorela drivers sila sa syudad.
Hisayran nga ang maong adlaw mao unta ang People’s Day apan, gisibog kini nga aktibidad sa City Hall aron i-akomodar ang mga naglisud nga mga rela drivers ning syudad.
Gitin-aw ni Adeser nga kadto lang rehistrado nga mga rela drivers ang makadawat sa benepisyo.
