CAGAYAN DE ORO CITY – Pahumanay na ang presensiya sa El Nino phenomenon apan nakadugang pa kini’g damyos sa panginabuhian ug kahimtang sa katawhan sa esteng bahin sa Misamis Oriental.
Kini human nakapalabang sa resolusyon ang naglangkob sa sangguniang bayan ug gisuportahan ni Tagoloan Mayor Atty Nadya Emano- Elipe ang deklarasyon sa state of calamity sa ilang lungsod.
Namahayag si Office of the Civil Defense 10 asst regional director Gilbert Conde nga bisan ubos na sa La Niña ang Pilipinas apan wala nagpasabot nga hingpit nang mihupay ang dala nga kainit sa El Niño dinhi sa Northern Mindanao region.
Gibutyag ni Conde nga nagbinugtong ang Tagoloan sa Misamis Oriental nga naka-deklara sa estado sa kalamidad subay usab sa damage assessment nga gihimo sa hingtungdang buhatan niini.
Tungod niini, misaka na sa 11 ka lugar sa rehiyon ang naka-state of calamity kay una nang nakaisa ang syudad sa Valencia ug laing siyam ka lungsod sa Bukidnon sukad pa sa miaging mga semana.
Hisayrang sobra 8 milyones pesos ang damyos sa epekto sa hulaw sa rehiyon samtang kapin 3 bilyones pesos pa ang gitakdang kompirmahon sa Dept of Agriculture o DA-central office.
