CAGAYAN DE ORO CITY – Kasuha’g kriminal sa National Bureau of Investigation o NBI-10 ang tag-iya sa mga bodega diin gihimo ang peke nga mga candy diha sa Brgy Mohon,Tagoloan Misamis Oriental.
Miingon si NBI-10 Regional Director Atty. Patricio Bernales nga kabahin sa ilang ipasaka nga kaso batok sa negosyanteng Taiwanese nga si Huang Teng Pee ang kasong pagsupak sa Republic Act No. 8293 o intellectual property rights o IPR.
Kini kon dili mokooperar si Huang aron itug-an ang pangalan sa mga negosyanteng Intsik nga nagpadagan sa paghimo’g mga peke nga candy sulod sa iyang gi-abangan nga yuta sa Phividec diin nakatindog ang duha ka warehouse.
Namahayag si Bernales nga pabiling wala pa nila masuta kon pila ang kantidad sa nabawi nga fake candies,ingredients ug mga ekip sa paghimo niini.Ipaubos usab nila sa hold departure order sa Bureau of Immigration and Deportation o BID kon magmagahi si Huang pagkooperar sa imbestigasyon.
Samtang gihimakak ni Huang nga nag-abang sa iyang mga bodega ang pipila ka negosyanteng Intsik sulod sa yuta nga gitukuran sa nagsira na niini nga Timberwood Devt Corporation sa lalawigan.
Kini human unang nasayran sa NBI-10 nga gipaabangan ni Huang ang duha ka warehouse diin gihimong planta pagmugna’g mga peke nga candy.
Namahayag ang abogado ni Huang nga si Atty Teofredo Rojas nga kabtangan na lamang sa kompanya ang anaa sa maong yuta kay mobalhin na kini sa laing espasyo sulod sa Phividec.
Namugos si Rojas nga saksi usab kini nga wala sukad nagkakita si Huang ug ang gitumbok nga negosyanteng mga Intsik nga utok sa pagpalusot sa mga peke nga kendi,sigarilyo ug ubang kontrabando.
