CAGAYAN DE ORO CITY – Mo-resulta sa pag-atras sa mga langyaw’ng mga negosyante ang kasamtangang bangi sa politika tali kang Pres Bongbong Marcos ug Vice Pres Sara Duterte.
Partikular nga gikabalak-an sa foreign investors ang giatubang ni VP Sara nga impeachment complaint sa senado.
Miingon si Ray Talimio Jr,presidente sa Misamis Oriental -Cagayan de Oro MSMEs Devt Council nga kon dili ‘political stable’ ang Pilipinas,magduha-duha usab ang mga dagkong negosyante pagbubo sa ilang pamuhunan.
Siya miingon nga mohatag usab kini sa paghuyang sa ekonomiya kon pananglitan mo-resulta sa kagubot ang tinguha sa administrasyon nga pagpapha sa katungdanan sa ‘most voted public official’ nga si VP Sara sa milabay’ng 2022 elections.
Dumduman nga una nang mipadayag ang Philippine Chamber of Commerce Incorporated nga sila direktang maigo sa negatibong impresyon sa international community sa panagbangi sa duha ka dagkong pamilya tungod lang sa politika.
