(Update) CAGAYAN DE ORO CITY – Pabiling walay pildi ang gitawag nga hulimaw sa boksing sa Asya nga si Japanese boxer Naoya Inoue.
Kini human nadugang sa iyang listahan nga gi-knockout ang isog ug kursada nga Pinoy boxer nga taga-Kapatagan, Lanao del Norte nga si Marlon ‘The Nightmare’ Tapales pag-abot sa ikanapulo nga hugna sa ilang unified boxing match sa Areake Arena,Tokyo City,Japan kagabii.
Unang gipaluhod ni Naoya si Tapales sa ikaupat nga round s hinungdang daghan ang nagtoo nga matapos na ang maong away kagabii.
Apan tungod sa estamina ug fight strategy nga bitbit ni Tapales nakahimo pa kini’g pagbalik ug namuntos sa mga misunod nga rounds sa away.
Sama usab sa gilauman,mitigbabaw ang sobra-sobra nga dala nga kargada ni Naoya rason nga nasapon sa mga kusog nga kinomo sa round 10 si Tapales ug hingpit na kining wala makatindog pa sa maong away.
Tungod niini,giila nga pinakaunang unified boxing champion sa Asya si Inoue nga naghupot sa World Boxing Council, World Boxing Association, World Boxing Organizatioon ug International Boxing Federation super bantamweight championship belts
.Mitala na usab kini sa pulos 26 ka daug diin 23 ang TKO samtang si Tapales nagbaton na sa upat ka pildi,37 ka daug ug 19 ang via TKOs.
Apan bisan sa kapildihan ni Tapales,daghan sa boxing fans ang midayeg sa nahatag niya nga performance kay mas lig-on pa kini sa ubang mga nakontra ni Inoue kay halos natapos niini ang 12 rounds.
