CAGAYAN DE ORO CITY – Wala makuha sa Boston Celtics ang kampeonato pinaagi unta sa pagpildi sa Dallas Mavericks sa ilang game 4 sa NBA finals sa Texas,USA bag-uhay lang.
Kini human sila ang gipildi sa Mavs tungod sa gipatuman nga adjustments rason nga nakab-ot nila ang unang kadaugan sa finals sa iskor nga 112-84.
Nabantayan sa NBA fans nga taas ang kumpiyansa sa Celtics kay tulo ang gikuptan nila nga daug apan gipakuratan sila sa atake ug depensa sa Dallas rason nga 3-1 na ang serye sa liga.
Nangulo sa kadaugan sa Dallas si Luka Doncic nga nakahimo sa iyang 29 puntos ug miabag usab ang iyang katimbang nga si Kyrie Irving nga may 21 puntos aron hikawan una sa kampeonato ang Celtics kay nalat-an sa 38 puntos.
Sukwahi sa game 3 nga nagbaton sa kumbinasyon nga 61 puntos sila Boston star players Jaylen Brown ug Jason Tatum,kini nalimitahan sa Mavs sa 25 puntos sa ikaupat nila nga panag-agbat.
Si Tatum nagkupot lang sa 15 puntos samtang 10 points gikan kang Brown.
Apan nagtoo ang daghang NBA fans nga wala presyura sa Boston ang ilang mga magdudula kay mas gusto nila mo-kampeon mismo sa ilang kaugalingong korte sa adlaw’ng Martes sa game 5.
Kon itugot sa higayon nga mo-kampeon ang Dallas batok Boston,sila ang pinakauna nga team nga makahimo’g kasaysayan nga makabangon sa 3-0 deficit sa NBA sulod na sa 156 ka attempts sa milabay’ng mga liga.
