Gipadayag ni US President Donald Trump nga posible niyang gamiton ang mga taripa aron pugson ang ubang nasod sa pagsuporta sa plano sa U.S. nga makontrol ang Greenland, nga matud pa kini importante alang sa nasudnong seguridad.
Apan gisupak kini sa mga nasud sama sa Denmark, Greenland, ug daghang lider sa Europa, nga nag-ingon nga ang kaugmaon sa Greenland angay lamang desisyonan sa Denmark ug sa mga Greenlander mismo.
Sa pikas bahin ang usa ka bipartisan nga delegasyon sa Kongreso naningkamot sa pagpahupay sa tensiyon, samtang daghang miyembro sa Kongreso ug kadaghanan sa mga Amerikano ang misupak sa plano nga pag-angkon sa Greenland.
Gani ang mga lider ug mga katilingban nga lumad sa Greenland nagpahayag sa ilang kabalaka ug kusog nga pagsupak, ug miingon nga dili nila gusto nga mausab ang kasinatian sa pagkakoloniya. (JANE ABULAG)
