(Update) CAGAYAN DE ORO CITY-Luwas na ang kahimtang usa ka residente nga nagbaton sa bun-og ug samad human naigo sa debris dihang mitay-og ang magnitude 6 nga linog sa Barangay Kili-Kili,Wao,Lanao del Sur.
Giila ni Wao MDRRMO head Francis Garcia ang biktima nga si Jurie Sagun,40 anyos nga nagpuyo sa maong dapit.
Gibutyag usab ni Garcia nga dul-ag 500 ka balay ang naguba tungod sa linog nga gisundan pa sa 5.3 magnitude nga aftershocks sa kadlawon sa adlaw’ng Huwebes.
Naguba usab ang pipila ka government buildings,mga tunghaan ug ang mga moske sa mga igsoong Muslim.
Samtang gibutyag usab ni Kalilangan MDRRMO head Jessica Gumban nga grabe usab ka apektado sa linog ang apat ka barangay sa Bukidnon.
Kini human miigo ang duha ka sunod nga kusog nga linog sa lungsod sa Kalilangan diin nagresulta pagkaguba sa sangguniang bayan hall,mga tunghaan,ospital,mga tulay ug mga kalsada.
Wala usab makalinggawas ang pipila ka barangay halls ug dul-ag 70 nga balay ang naguba tungod sa miigo nga linog.
Hisayrang dako nga bahin sa Mindanao ang nabatian sa magkalahi nga intensity human ang magnitude 6 nga miigo sa Bukidnon ug Lanao del Sur niadtong Abril 12 sa kadlawon.
