CAGAYAN DE ORO CITY, Philippines – Igo ra sa paghangyo’g pasaylo ang nabungat sa taxi driver nga nakaligis-patay sa usa ka graduating student sa Mastersons Avenue, Upper Balulang ning siyudad.
Sumala ni Police Cpl. Bryan Cuhit, imbestigador sa Cagayan de Oro City Police Office – Traffic Enforcement Unit (COCPO-TEU), mi-u-turn ang driver sa taxi aron mu-pick up sa pasahero apan walay swerte nga nakabangga kini sa motorsiklo nga gimaneho sa biktima.
Naila ang biktima nga si Beb Emmanuel Dologuin, 19 anyos, Grade 12 student, ug residente sa Macanhan, Barangay Carmen ning siyudad.
Matud pa ni Cpl. Cuhit, adunay nakakita nga kusog ang dagan sa motorsiklo nga may backride, busa nakahiagom kini sa grabeng kadaot human gidumbol ang kilid sa taxi.
Ang insidente nagresulta sa pagkabali sa wala nga paa, tuo nga kamot, ug samad sa ulo sa biktima.
Gidala siya sa JR Borja City Hospital ug didto gideklarar nga patay na.
Gikustodiya sa kapulisan ang driver sa taxi nga nagpaila sa alyas Lee Boy.
