Misupak ang lupon sa mga taxi drivers sa syudad sa sugyot nga ipapangayo na lamang sila og taripa aron ma-usbaw ang plitehan.
Klaro nga gipadayag ni CAFETADA President Bernie Jamaca sa iyang interbyu sa Bombo Radyo nga mas gusto sa mga drayber ang calibration sa metro, busa ilang gisalikway ang sugyot sa Transport Development Office tungod kay dili kini makatarunganon ug mahimong pabug-at lamang sa mga pasahero.
Hinuon, ilang gipaboran ang pormal nga pag-usab sa metro diin ang flag-down rate gikan sa ₱40 mahimong ₱50, samtang ang sunod kada kilometro gikan sa ₱13.50 mahimong ₱15.
Dugang pa niya, ang waiting time matag minuto nga ₱2 gisugyot usab nga mahimong ₱3.Sa katapusan, gipadayag ni Jamaca nga malipayon ang mga taxi drivers kay dugay na nilang gipangayo ang maong kalibrasyon ug karon anaa na sa proseso ang mahitabong reprogramming ug recalibration sa metro sa mga taxis.
