CAGAYAN DE ORO CITY – Gipakita sa Team Padayon OSM ang ilang puwersa atol sa paglusad sa ‘Lihok’ diin katiguman nga Panaghiusa sa Hapsay nga Cagayan sulod sa Atrium,Limketkai Center ning syudad karong gabii.
Kini agi’g sinyales nga andam na ang alyansa sa partido Padayon Pilipino ug bando ni kanhi City Mayor Oscar Moreno sa ilang opensa ug depensa sa grupo usab ni incumbent City Mayor Rolando’ Klarex’ Uy sa pagsugod sa kampanya ugmang adlawa.
Tinambungan sa halos 7-mil ka representasyon sa nagkadaiyang sektor sa dakbayan,gipadayag sa mga kandidato ang ilang kagustuhan nga magpapili aron makasilbi sa katawhan.
Miingon si Moreno nga miagi man sa grabeng pagsulay sa bangi sa politika ang duha ka grupo apan wala niini igsapayan aron lang mahiusa ug kab-uton ang kadaugan diin nagtinguha nga mabalik ang tinud-anay nga kahimtang sa dakbayan.
Gitumbok sa kanhi mayor nga angayang mabalik kung unsa ang kahimtang sa syudad kaniadto nga giingong napasagdan sa kasamtangang administrasyon.
Samtang sa pikas bahin, nanglugwa ang impormasyon nga gitakda usab molusad sa mas dako nga katiguman ang alyansa ni Mayor Klarex ug Cagayan de Oro 2nd District Cong. Rufus Rodriguez sa convention center sa Taguanao,Brgy Indahag ning syudad s adlaw’ng Sabado.
Apan wala pa’y kompirmasyon nga gihatag niini ang mga sakop sa mayor kung ensakto ang nanggawas nga mga kasayuran.
