Gipahimangnoan ni Solutions Architect ug CEO nga si Joever Monceda ang publiko bahin sa doble-kara nga epekto sa Artificial Intelligence o AI, diin bisan naghatag kini og kasayon sa edukasyon ug negosyo, nagdala gihapon kini og seryosong hulga.
Sumala pa kaniya, gawas sa pagpadali sa proseso, naa na usab karoy agentic AI nga makahimo sa pagkontrol sa kompyuter ug pagpatuman sa mga sugo nga wala nay gikinahanglang tuplokon sa tawo.
Gipadayag usab sa inhenyero nga ang maong teknolohiya maoy nag-unang hinungdan sa pagtangtang sa pipila ka trabahante, ilabi na sa BPO sector o mga call center, tungod sa automation.
Samtang sa pikas bahin, nagpahimangno siya nga mag-amping sa pag-click sa mga kadudahang link tungod kay dali ra magamit ang AI sa paghimo og peke nga impormasyon ug phishing aron mang-kolekta og personal nga datos.-.
